現年50歲嘅超級富豪「小小超」李澤楷，去年情人節同24歲港姐季軍郭嘉文（Karen）遊東京，Karen雖然只喺無綫擔任《東張西望》節目戶外主持，不過近日佢被踢爆以個人名義，一炮過豪擲逾1.068億元購入九龍塘逸瓏天池屋，呎價近5萬元，一度創項目呎價新高。
冇做按揭
據土地註冊處資料顯示，Karen買入第5座頂層單位，實用面積2,188平方呎，另有1,855平方呎天台連泳池，而重點就係Karen買呢個豪宅冇做任何按揭，而代表買家簽訂臨時買賣合約文件嘅人，係盈大地產副主席及行政總裁李智康，即小小超嘅手下猛將！估計月入約兩萬元嘅Karen，兩年前當選港姐時仍住馬鞍山屋苑，唔通小小超真係同Karen拍拖，豪送逾億單位畀女友？
馮仁昭向小小超求證，佢以短訊回覆：「Have a good evening！」冇否認此事，馮仁昭叫佢如有喜訊公佈要通知，小小超就回覆OK公仔，不過問到有冇結婚計劃？佢就冇表示嘞。
撰文：馮仁昭