利物浦周六就會喺英超大戰愛華頓，上演默西賽德打吡。為咗好好備戰，紅軍決定出動私人飛機，喺巴西接菲臘比古天奴（左）同羅拔圖法明奴（右）返嚟。巴西喺當地時間周二晚世盃外主場對巴拉圭，古天奴同法明奴踢完又要轉機返嚟，如果航班仲延遲，分分鐘周五先返到球會，所以利物浦就租架私人飛機，除咗確保佢哋周四返到嚟操練外，仲可以畀佢哋喺機度好好休息。