目前樓價點解難跌呢？簡單市場道理話俾我地聽，市民對住宅嘅名義需求大過住宅供應量，而且呢種名義需求有銀紙支持，係有效需求（effective demand）嚟嘅，並非空口講白話。唔係話香港現時樓價遠遠大過收入嘅咩？有效需求從何說起？
律師T話最近佢律師樓嘅按揭生意好咗，連佢認識嘅一位政府退休司機亦幫襯賣樓。司機為兒子買樓，先賣一層400呎，得款400餘萬，再幫兒子交買樓首期300萬，買入一間750萬嘅新樓；佢話個仔供得起450萬按揭，但無法子儲夠首期喎，自己唔幫手，個仔就好難好難上車。退休司機原來有兩層樓，都係三十幾四十年前買落，老早供甩晒嘅，現在樓價升到高位，所以司機有「財富效應」，賣一層套現嚟幫兒子做業主。
律師T話：「司機都有兩層樓，你話香港有幾多呢類人可以幫兒女上車呢？」咁又係，據馬時亨憶述，1973年佢在大通銀行打工時，月薪千六，長實推出賽西湖大廈，1260呎單位賣28萬元（左丁山記得有一位同學當年傾全部儲蓄買咗一間，日日吃極簡便三餐，用極樸素傢俬，奮力供樓，直情捱到有啲面青），馬時亨話買唔起。時至今日，一個賽西湖1260呎單位已升值至近乎2100萬，升值75倍，如果一位當年一手業主肯為兒女買樓交首期，利用呢個財富效應，方法甚多。香港有冇幾十萬戶呢類業主呀？差不多所有1990年前買咗樓嘅當年年青夫婦／今天退休人士，皆是此類人士，還不計算在內嘅，係35年來在大陸開廠發達嘅不同廠家及內地有錢有辦法之人。以左丁山觀察，目前樓市之支撐點，不是香港經濟，而是過往積累嘅財富，如施永青講到1997年嘅香港銀行總存款係兩萬幾億元，今天係11萬至12萬億元，而且銀行利率及供樓按揭利率比1997低起碼兩倍至三倍，故此樓價唔高過1997先至奇怪。馬時亨初出道時之月薪，可買8呎賽西湖大廈，今日港大畢業生同樣入摩根大通，月薪未必夠買到一呎，故此青年買樓困難，千真萬確，但不可不知，馬時亨爸爸冇錢，今日馬時亨女兒嘅父親有大把錢！普遍而言，今日香港富爸爸嘅數量比1973年多出不知幾多倍。分析師計港人收入（income），不計港人財富（wealth）嘅話，就好容易估算錯誤嘅嘞！