現年41歲趙薇自從嫁俾富商黃有龍後，積極喺商界發展，不過早前肖建華被挾，波及趙薇旗下嘅萬家文化，搞到趙薇身家冇咗一大截(新聞連結： http://bit.ly/2nGoeD1 )。近日變得低調嘅佢，早幾日就專登嚟香港睇藝術展覽，期間就見佢眉頭深鎖。
商場上觸礁，身為人母嘅趙薇原來亦要頭痕同7歲囡囡黃新(乳名：小四月)嘅母女關係。昨日有報道話趙薇日前出席杭州一個演講會，自爆曾效法媽媽體罰教女嘅方法。趙薇喺演講會上講：「因為自己細個經常被當教師的媽媽體罰至初中。於是教女亦照辦煮碗，狠狠打了囡囡幾次。後來我發現，她始終不是我，我(被)抽(揪)完了會完全忘記，但她(囡囡)可以一星期不理睬我。」
到後來，由於趙薇工作繁多，搞到好夜先返屋企，為咗爭取時間陪愛女，往往囡囡有要求，趙薇都照單全收，搞到囡囡有恃無恐，往往變得驕縱。趙薇講笑話：「其實我不是虎媽，但我家有個虎妞。」所以趙薇認為教兒育女，要取一個平衡，其實係一門高深學問。