小朋友講起操練TSA（BCA）就喊晒口，但其實佢哋快樂可以好簡單。噚日恒生總行博愛堂就塞滿笑容燦爛嘅細路同家長，佢哋都係參加該行同香港乒總舉辦嘅「恒生乒乓球學院」2016畢業典禮，大會播放學員分享乒乓與成長路嘅短片，其中一位可愛小妹妹話：「有10個鍾意乒乓波」㖭！
恒生執董馮孝忠（Andrew）同香港乒乓球代表隊杜凱琹打友誼賽，雖然面對高手，但Andrew多次開出側下旋球迎擊，最終只以5：7落敗。Andrew同華華講，小金王胡經昌「都係好打得（乒乓球）」，大家仲即場相約，搵日切磋。
咁多小朋友現身，平日煮慣山珍海錯既博愛堂大廚亦好細心，專登預備啱細路口胃嘅小食招待，包括咖喱魚蛋、煙肉腸仔、炸花枝丸、箒喱糖同Haagen-Dazs迷你雪糕。