球場保安真係唔掂，喺周一科特迪瓦對塞內加爾嘅友賽，不斷有球迷衝入場搞事，令球證腰斬賽事；唔好以為場波喺非洲踢，係喺法國首都巴黎㗎。呢場波先由塞內加爾靠沙迪奧文尼射入12碼領先，之後科特迪瓦好快就追平，其間都見到看台好混亂，仲有球迷爬欄杆。直至88分鐘，越嚟越多球迷突破保安防線，走入球場，仲「攔截」埋球員（圖），所以球證索性腰斬。