嗱，紀錄呢樣嘢，係要嚟破嘅。曼聯今季初收購法國中場保羅普巴，打破加里夫巴利嘅世界最高轉會費紀錄，堂堂英超豪門，佢哋又點會收手？據報紅魔今夏準備動用兩億歐元，即係大約16.8億港紙，強挖西甲巴塞隆拿前鋒尼馬，繼續打造超級陣容。
雖然曼聯今季英超戰績麻麻，爭前四有啲被動，不過已經拎咗英聯盃，歐霸盃亦打入八強，管理層對領隊摩連奴都好信任，所以準備繼續開大水喉畀佢買人。唔講唔知，摩佬之前教車路士嗰陣，已經好欣賞尼馬，不過當時車仔班主阿巴莫域治唔願科水；據西班牙《每日體育報》報道，兩億歐元係尼馬合約買斷價，巴塞冇得say no，關鍵係尼馬肯唔肯離隊。
尼馬或為金球獎過檔
其實尼馬踢咗巴塞咁耐都順風順水，年年都有盃捧，但一來巴塞始終係美斯最大，佢暫時最多只係二佬，加上西班牙稅局一定盯住尼馬兩父子，所以離開西甲都係上算。身為巴西天之驕子，尼馬周一出席對巴拉圭嘅賽前記者會嗰陣，就話喺巴塞四年一直都好開心，而且有美斯呢個隊友，可以令佢加快成長，不過25歲嘅佢都提到好希望拎金球獎；講真，如果佢留喺巴塞，就真係幾影響爭金球獎嘅機會。除咗天價轉會費，曼聯對尼馬肯定一啲都唔會虧待，如果真係轉得成會，尼馬將可以獲2,500萬歐元（約2.1億港元）年薪，係𠵱家喺巴塞嘅兩倍。
普巴對於保唔保得住自己全球最高轉會費嘅紀錄，未必好關心，不過呢位孝順仔就好關心老竇。普巴因傷冇入選法國大軍名單，周一照返法國，同79歲老竇慶祝生日，佢老竇法蘇之前係球員兼教練，30歲嗰陣逃避戰亂，由幾內亞偷渡到法國，慢慢安頓生活後就成家立室，再生咗普巴呢位球星。
摩佬人工多哥帥一倍
講真，曼聯就好似觀音開庫咁，啲錢多到使唔晒。好似摩連奴就以年薪2,806萬歐元（約2.3億港元），力壓國足教練納比，成為全球最高人工主帥，仲足足比曼城領隊哥迪奧拿多一倍！嗱，拎得高人工就要考吓功力喇，因為受「FIFA病毒」困擾，紅魔有基斯史摩寧、費蘭尼、菲爾鍾斯等受傷，而伊巴謙莫域同安達靴里拉就停賽，嚟緊主場對西布朗場英超，唔知摩佬點排陣呢？