情場浪子余文樂早排才公開認愛，證實同台灣皮帶大王千金王棠云拍拖3個月，不過，日前有網民喺微博爆相，話喺曼谷遇到男神余文樂，同行仲有一男兩女，從相片中所見，短髮女着牛仔熱褲，長髮女就紥咗髻仔，兩女齊騷4條白滑玉腿，仲有另一位網民爆料，話阿樂坐租車去嘆皇帝浴㖭。
有大陸報道更加繪聲繪影指阿樂拖女夜蒲紅燈區，由於王棠云擁有一把長髮，短髮女肯定唔係佢；長髮女就只睇到背脊，究竟係咪王棠云就冇人知。
之前阿樂公開承認戀情時，被問到係咪認定女友為結婚對象？當時樂仔話：「冇認定，係被迫嘅，因為都俾人影咗囉。」難怪有網民質疑阿樂女友冇份同遊曼谷，抵死留言：「女友王棠云前段時間才公開戀情，這是要散的節奏嗎？」
有人八卦問究竟喺邊度見到阿樂？影到呢張相嘅網民回覆：「曼谷。日本街的一家酒樓，叫頌通酒家，他幾乎一個月就要去一次或者兩次，服務員給我說的。」謎底終於解開，阿樂同友人食完飯離開，預備搭車時被網民影咗相，並唔係蒲紅燈區囉；冇人知王棠云有冇同行，而另一位網民爆阿樂去嘆皇帝浴，都係唔知真定假。
而阿樂前晚就喺Instagram貼咗張相，係佢攬住媽咪爹哋影嘅，留言話「family time」，似乎係話畀網友知，同行仲有父母嘅……