【KOL個L】KOL個L，今集L for Love。當有90後自封「愛情KOL」，就被插「少年你太年輕了」。想做愛情KOL，必先係戀愛達人？作家孤泣坦認愛情經驗豐富，「我拍咗好多次拖㗎喇，反而我係失戀多，寫痛楚遺憾嗰啲係好明白。」另一位作家李專就唔同喇，「（拍拖）數量就唔算話太多，但深刻程度係高，（經驗）令我反思好多。」寫專欄多年嘅王貽興認為，寫愛情唔一定完全靠自身經歷，「張愛玲都講過，我哋先見到海嘅圖畫，然後先真正見到大海；即係先睇愛情小說，然後先知道愛，所以唔可以淨係從經驗分析。咁個個喺蘭桂坊身經百戰，咪寫一百幾廿本書？譬如我寫咗十幾年（專欄），老實講，靠自己經驗嘅，一早已經冇晒，o依家都係靠好多觀察。」
然後，有一種爆Like，叫逗號？
孤泣覺得標點符號非常重要，「好多人都話痴線，點解寫咁多標點符號？但係其實係有用㗎，呢個係我寫作方法。因為文字上好難有畫面，惟有用標點符號去令你好畫面。我要你喺果零點零幾秒唔睇落去（之際），就一個大爆炸，嘭！」王貽興笑話：「細個用嚟呃字數嘅話，交功課就用多啲逗號啫。除非鄺仔啲稿費係連標點符號計，咁佢啲逗號就有意義喇。咁我未去到佢呢個級數，所以我都係正常跟返語法咁用。」
逗號很累，但逗號不說。
除咗標點，近年香港亦吹起治癒系風潮，用溫暖文字撫慰讀者心靈。或者治癒風就係「吸like靈藥」？李專覺得自己都算係治癒系作家，希望文章為讀者帶嚟正能量，「以前我覺得自己嘅文字so far so good，但近半年收到越來越多人嘅反應，開始感覺到文字有個力量。」不過，身為香港三大治癒系作家嘅孤竟然話：「啲人話咩治癒系作家，其實我係虐待系作家，係幾虐待啲人，我要佢醒呀！我最鍾意係寫咩呢？遺憾。有遺憾先係你嘅人生。」而王貽興就覺得佢係「唔算系」作家，「即係唔識計算嘅作家囉，我唔似得佢哋咁叻去雕琢同埋去到撚嗰啲字，咁所以我屬於『唔＿系作家』。」
講到底，想贏like最緊要都係要引起讀者共鳴。孤泣揀寫作題材有自己一套，「我比較鍾意寫現實世界嘅愛情故事，而我寫啲故事，啲人就係鍾意睇，咁算唔算跟個market走？我唔知。」而李專花咗唔少時間去拆解女人心，「好多時我會問另外一半點樣諗，從彼此之間嘅磨擦、衝突去反思，將素材放到文章。我覺得自己嘅文係比較貼地，如果件事本身我唔會做到，就唔會放落文章。」王貽興認為近年有唔少愛情專頁爆紅，並唔係因為貼文內容具創意或洞見，「單純因為佢講到我想講嘅嘢就得。男女都好，好鍾意tag自己另一半，呢個成語叫做『借刀殺人』！」想留住網民嘅心，仲要先信自己。貽興分析：「要好相信你自己講嘅嘢係真理，even你講一句阿媽原來係女人，跟住大家都會覺得好真。即係一定要有呢種自我催眠，先寫得出嗰啲嘢 。好坦白講，有啲我係寫唔出。」
三位咁有心得，莫非就係傳說中嘅愛情KOL！孤泣就話，「我一定唔係，又冇錢收。開個班去教人愛情嗰啲，我覺得其實有啲廢話，有朋友會參加嘅，我都叫佢：『你諗下先啦。愛情真係永遠冇專家。』」李專對於呢個term?晒頭，「我唔算愛情KOL。日日寫愛情，可能都有啲盲點。我亦有自己嘅缺點，一路進步緊。」王貽興笑笑口話：「我好肯定我係KOL，但一定唔係愛情KOL，因為我冇資格，冇經理人簽我！」仲叫大家唔好太認真，「總之求過癮，可以tag吓人、借刀殺吓人，幫自己嘅自我形象貼金，開心咗咪算，何必咁認真呢？」
唔好錯過第一集
【KOL個L】敢做唔敢認 KOL爆Likes先係King？
http://bit.ly/2o7flQF
場地提供：小時光scoool、Partyland
記者：何宛珊(表妹)
攝影：Neo、Teddy、Kaman
視像設計：希彤、余湘汶
後期：Roy
編審：阿仙
監製：Kaman