提起岑麗香，必定聯想到「處女黨」呢個keyword，之不過，香香公主舊年12月中喺溫哥華嫁畀任職國際金融集團加拿大分部高層強強（Joshua），仲話自己習慣被稱呼為「強嫂」，而處女黨5名成員，4名已成人妻，而且各人都喺婚後勁快復出，非常勤力。
「處女黨」最先成為人妻嘅係李亞男，佢喺前年情人節嫁比身高差一截嘅王祖藍，喺度蜜月後，李亞男好快復工搵錢，拍咗老公有份主演嘅大台劇《老表，你好hea！》等劇集，其後約滿，李亞男更「嫁雞隨雞」，跟老公北上搵「人仔」。
第二個出嫁嘅「處女黨」成員，係鍾嘉欣，佢喺前年低調同TVB前行政主席梁乃鵬個侄仔、脊醫Jeremy Leung，並喺舊年2月底補擺喜酒，同年生埋囡囡Kelly。喺生B後，嘉欣極速收身，復出賺奶粉錢。
接棒嫁嘅係曾經有「TVB首席處女」之稱嘅王君馨，佢喺舊年11月入紙同拍拖11年嘅男友Daniel入紙排期註冊結婚，之後佢有喺網上公開訂婚party相。而佢一直都密密做，未有停工。
「處女黨」中唯一未出嫁嘅成員，就剩番現年33歲嘅苟芸慧，不過，日前佢出席公開活動時，提及賽車手男友陸漢洋時，直認視對方為結婚對象，仲話：「人哋咁認真對待，我都會好認真。」