當選特首後首要任務除咗組班，谷番民望都可能係林鄭嘅主打。噚日朝早佢出發去商台同港台節目時，就捨棄專用座駕，由灣仔搭港鐵到九龍塘，再轉小巴到首站商台，凸顯親民同貼地作風，之後又到樂富茶餐廳食早餐，獲市民包圍影相，林鄭仲大談另一半，話丈夫林兆波對「第一先生」好抗拒；反而佢就唔多介意得票係777，笑指唔覺得邪但覺好蹺。
林鄭出席電台節目後繼續落區，坐AM190候任特首座駕去樂富「三和茶餐廳」幫襯，點咗熱奶茶同蛋牛治，其間有市民帶埋政綱小冊子攞佢簽名兼合照，甚至獻吻，最後佢用八達通埋單後離開。八方發現全程陪伴在側嘅茶餐廳老闆娘「七嫂」好面善，原來「七嫂」馬麗媚係樂富中心商會主席，仲曾任汕頭市政協委員，唐唐同梁振英當年參選都有去呢間茶記幫襯。
李律仁叫唔好要第777張票
外界關注佢老公會否出任多個非牟利團體嘅名譽職位，林鄭話老公好低調，唔出任係佢嘅意願，更指佢對被叫「第一先生」好抗拒，笑稱可能要叫佢做「行政長官配偶」。林鄭話為官多年，丈夫甚少陪同出席活動，日後若外訪，可能只係某國嘅數學機構（因為林生讀數㗎）或到北京可以順道探囝囝，先吸引到佢。至於會唔會做兩屆特首，佢笑稱：「學精咗，有啲嘢唔講到咁絕對，世事無常。」重提欠咗丈夫好多，如果要再等5年相信佢會好唔開心。
至於777票成為熱話，尤其被指似粗口諧音，林鄭唔多介意，話7字喺聖經係幾好嘅數字，「七三廿一，走為上着，係唔係前路坎坷？」仲爆料話，當日佢有776票時，選舉主任問佢要唔要嗰張可接受嘅問題票，佢都同競選團隊成員李律仁話乜咁蹺，李仲講笑話不如唔好要？但張票明顯投畀佢，所以都接受，自言唔覺好邪，只好巧合。
李八方