現年62歲的成龍，去年11月獲奧斯卡頒發終身成就獎。英皇集團老闆楊受成昨晚在灣仔君悅酒店設宴為他慶祝，出席圈中人包括張學友、謝霆鋒、劉嘉玲、黃秋生、曾志偉、古巨基、許冠文、岑建勳、余安安及劉天蘭等，秋生更笑指自己到場為頴撈。
老婆祖名冇影
成龍昨晚約6時接受傳媒訪問，心情靚爆的他表示不知道開了多少席，又說本來想低調，惟楊受成堅持要為他慶祝，他謂：「今晚搵咗幾十年同我合作嘅朋友，好多朋友今年見完下年就唔見咗，所以今次見老友為實。」
成龍續說：「由提名到攞獎都得到好多褒獎同恭喜，本來都唔想搞，唔想俾人話炫耀，但係楊生話一定要搞。」昨晚未見老婆林鳳嬌及囝囝房祖名現身，他笑謂：「佢哋冇嚟，佢哋日日見住呢個奧斯卡（自己）都睇到悶啦！」又指祖名沒有致電恭喜他。
成龍講獎項滔滔不絕，但問到近日吳綺莉涉刑事恐嚇被捕，他即裝聾說：「今日咩事呀，仲有冇啲乜嘢呀？」隨即閃人返回場內。另外，張學友昨晚到場時，被問會否恭喜郭富城結婚？學友笑說：「梗係恭喜啦，唔通嬲咩，都應該啦！」問他送甚麼禮物給成龍？他則說：「唔使送啦！我噚晚巡迴返嚟，聽日走喇！」
霆鋒被催開騷
及至晚上7時多現身的霆鋒同樣表示沒準備禮物：「我嚟戥佢開心、戥佢驕傲，能夠踏上國際舞台，攞個咁有代表性獎項。」日前霆鋒上載去卡拉OK唱張學友的《藍雨》的片段，被網民讚好聽及催促他開演唱會，他笑謂：「南乳五花腩就有。」
採訪：張俊銘
攝影：沈健程