71歲嘅退休法官胡國興成為今屆特首戰奇兵，因選戰而發掘咗一個新世界嘅胡官，似乎都樂意同粉絲繼續溝通，佢噚日拍咗條短片放上facebook，再次多謝俾票佢嘅選委，「同埋冇投票畀我、但係心裏面有我嘅選委，仲有全部冇票喺手、但係一直支持我嘅市民」，又話睇番大家為佢打氣嘅留言，畀佢好大鼓勵，「感激又感動」。
胡官話清理緊佢嘅競選辦，但有個喜訊畀大家，「我會將我嘅小陣地移去個人facebook Kwok Hing Woo，同大家繼續分享我日常生活嘅點滴，或者會有啲好笑、有趣、有意義嘅嘢，話俾大家聽都唔定，希望你哋會轉過去follow我，到時我仲可以follow番你哋㖭。」
而入唔到閘嘅葉劉亦讚胡官有體育精神，稍後邀約對方撐枱腳。