容祖兒前晚假灣仔演藝學院舉行「My secret live」演唱會，主打唱side track歌曲，將家裏的miffy公仔、私家枕頭都搬上舞台。她跟觀眾分享她的私密，自爆擇偶條件：「我完全唔會睇外表，男朋友都唔會揀靚仔，唔鍾意靚仔唔代表鍾意醜樣！Average（平均）啦，反而鍾意啲有肉地，淋淋地嗰啲。」有觀眾搞鬼嗌陳奕迅，祖兒睩大眼說：「佢係below average（低於平均）喎！哈哈！有肉地又好搣又好攬，好似Wyman（黃偉文）咁，我都OK佢㗎，不過我梗係知道Wyman唔OK我啦。」
悼化妝師戰友
與男友劉浩龍（師兄）打得火熱的祖兒甜絲絲說：「喺我眼中冠軍嘅擇偶條件，就係有音樂才華嘅人！」之後祖兒更讀出一封13歲時寫給初戀男友的情信：「點解我會X你？因為你可愛得意，你X唔X我啊？」觀眾大叫，祖兒笑說：「X唔係你哋諗嘅意思。」去年並肩作戰的化妝師Arris病逝，祖兒唱《舊日回憶的山丘》悼故友，尾聲時她換透視裙感觸說：「好多年前我都係一粒滄海遺珠，當時簽過好幾間嘅公司都冇人要，好細個就同自己講，唔好錯過任何一個機會，把握任何一個機會去努力。」
師兄符合條件
完騷後祖兒在後台接受訪問，她自稱是意念總監，問到公開情書是否自己構思？她說：「梗係，覺得要講啲以前冇講過嘅嘢。」問有否跟師兄講過「我X你」？祖兒笑說：「佢唔X（鬧）我就偷笑。」會否叫男友增肥符合她的擇偶條件？她說：「佢本身都符合。」捧場的謝霆鋒完場後馬上離開，未有接受訪問。
採訪：馬建華