做萬科（2202）管理層真係一啲都唔容易，又要應付日常運作，又唔知上面班股東爭拗到幾時。呢兩年風高浪急，總裁郁亮噚日喺業績會上面，俾記者問佢個樣做乜滄桑咗。佢笑一笑話自己根本就係「農民」嚟，日常任務就係「種地」，「幹農活一般都比較辛苦，外面天氣變化比較大，會累一點」。
郁亮呢個比喻都幾貼切，一嚟本身啲膚色黑黑實實，一頭剷青短髮，揸個鋤頭加隻牛，其實都幾似。二嚟地產商咪就係喺塊地上面種啲嘢出嚟囉，不過每平方呎嘅樓，一般嚟講貴過啲米、菜好多咁解。講講吓，郁亮仲喺度自嘲話，戴咗條淺綠色嘅呔出嚟，本身諗住睇落去青春啲，點知反而令人覺得佢憔悴咗。加埋中國A股，啲股價跌係顯示綠色，紅色代表升，「下回還是不戴綠色，戴紅色吧」。