【KOL個L】 KOL三個字，曾經因為一個post收五萬like爆，後來被插寫鱔稿、無料到，嬲爆；然後再被指係筍工，大台like爆，真係「來回地獄又折返人間」，究竟KOL係乜東東？問街坊，唔少都話未聽過，只有幾位受訪者知道。In case你唔知，KOL係解「關鍵意見領袖」（Key Opinion Leader）。
究竟點先算係KOL？
YouTube Channel有近五十萬人訂閱嘅笑波子話：「我覺得自己係一個帶住正面嘅KOL，全程想搞笑多於教育。」但係寫愛情文章嘅孤泣、李專，同埋IG紅人Merry So都覺得自己唔算係KOL。《廣告狂人》專頁主編Raymond就話：「KOL呢個term應該由人哋封好過自稱，《廣告狂人》絕對唔係KOL，（廣告界）KOL梗係徐緣同畢明啦！」畢明聽到即刻耍手擰頭：「冇本事，唔敢！擔得起KOL呢個名，要睇下key唔key，係咪leader，opinion就人人都有。」佢話有啲人嘅like純粹係為咗個「笑」字。對於like，陶傑就有另一個睇法：「我會話KOL係King of Likes，like你嘅人越多、越支持你，咁你先係King！」佢認為Donald Trump先係當今最成功嘅KOL。不過，著名作家王貽興就認為「搲like」並非無理：「其實搲唔到like嘅，就無飯開，咁梗係要搲啦！唔搲嘅話，搲爛腳咩唔通！」
當KOL個L，指「like」（讚）係一回事，指「lie」(謊言）就係另一回事。街坊李先生話有時都睇唔過眼，佢話：「偽KOL都有呀，成日拍好多片就係呃sponsor（贊助商）。」陳先生亦話：「如果齋做生意，咁大家要小心啲！」畢明直言時下某啲KOL已經變質：「係一個有組織地搲鱔稿寫嘅現象。」不過換另一個角度，徐緣就相信KOL有唔少經濟發展潛力，「KOL係內容生成者，國內叫網紅，其實背後有好大商機。」王貽興更加一句講晒：「點樣去講個initial（簡稱）都唔係問題，講到尾就係大家都搵食囉！講完，句號。」
未完！《KOL個L》一連五集拆解KOL，有正有反，有讚有彈，齊齊問世間KOL為何物。下集訪問 L for Love 嘅王貽興、孤泣同李專，講下點先可以成為熱爆網絡嘅愛情KOL。
記者：何宛珊(表妹)
攝影：馮峰、Neo、Teddy、Kaman
圖像設計：希彤、余湘汶
後期：Roy
編審：阿仙
監製：Kaman