現年48歲嘅邱淑貞（豆斗），99年嫁畀I.T集團主席沈嘉偉後，息影做幸福少奶奶，育有三女嘅佢，大女沈月已經15歲，因為佢五官標致成為最索星二代。潮媽豆斗不時孖囡囡行街，日前佢就同兩個囡囡沈月同沈日，仲有估計係邱淑貞媽媽，三代同堂出巡銅鑼灣利園。12歲嘅二女沈日同豆斗糖黐豆手拖手，大女沈月就肩負照顧外婆責任，又搭膊頭又拖到實，佢哋仲全程有講有笑，沈月非常孝順。
沈月警覺性高
戴住太陽眼鏡嘅豆斗，星味十足，但對四周情況毫無戒心，唔及大女警覺性高，沈月搭扶手電梯嗰陣，經常回頭望。豆斗一家先去利園五期教學中心拎章程，然後再折返利園二期，去咗LV專門店買皮篋。佢哋入到間舖，即有店員同佢哋打招呼，又攞出個細型號嘅皮篋畀豆斗睇，見豆斗檢查完皮篋拉鏈同角位，即爽手喺銀包拎出信用卡，碌卡畀錢，前後唔夠10分鐘。其間兩個囡囡好乖企埋一邊等，沈月又好貼心照顧外婆，佢哋買完篋後，就去咗停車場上車離開。
撰文：馮仁昭
