由性感女神林志玲代言嘅Bra股都市麗人（2298）新任首席財務官（CFO）盧康成，舊年12月正式由紙巾股恒安（1044）過檔，噚日佢出席新公司業績會，話晒由紙巾走到內衣市場，有無唔慣？盧康成就話，兩邊業務十分唔同，壓力當然有，但來源就唔喺來自業務本身，而喺兩間公司老闆年紀。
佢解釋話，恒安老闆已經60幾歲，但都市麗人老闆、即董事長鄭耀南只得40出頭，大把精力，成日都會打電話畀佢催佢交嘢，咁睇嚟盧生真係少啲精力都唔得。
不過問到點解要過檔，盧康成就冇特別解釋，只係答「好多種種原因」，對於佢任內首份成績表，去年都市麗人純利按年跌55%至2.42億人仔，收入亦都減少9%，佢就話𠵱家係行業調整期，對今年依然審慎咁話。