雖然已經34歲，但迪科爾證明英格蘭領隊修夫基重召佢嘅決定係冇錯！呢位新特蘭射手喺周日世盃外正選登場，幫英軍先開紀錄，協助球隊主場以2:0擊敗立陶宛。賽後修夫基仲話，下年有機會帶迪科爾去俄羅斯踢世盃！
拖患癌球僮帶隊入場
因為英格蘭前鋒荒，所以修夫基召咗迪科爾入伍，原本以為佢係做吓後備，但周日對立陶宛場波，竟然搵佢打單箭頭。賽前有段窩心嘅小插曲，迪科爾嘅球僮係患上癌症嘅五歲病童路維利，臨出場前，隊長赫特同迪科爾調位，等迪科爾可以拖住路維利帶隊入場。迪科爾喺一次醫院探訪識咗路維利，之後喺新特蘭對愛華頓場波，迪科爾邀請路維利嚟做球僮，兩個好老友。
比賽前有默哀儀式，悼念日前倫敦恐襲嘅死難者。四年嚟首次國家隊正選，迪科爾21分鐘接應史達寧傳中射入，為英軍開紀錄。佢喺60分鐘被換走，由占美華迪入替。華迪66分鐘入波，幫英格蘭鎖定2:0勝局。英軍喺世盃外歐洲區F組以13分排榜首，領先第二嘅斯洛伐克四分。修夫基好滿意迪科爾嘅表現，「如果佢保持咁好嘅狀態，點解唔可以揀佢踢世盃？」拉爾拉拿仲話迪科爾好似25歲嗰陣咁「弗」。
