禮拜三（29日）谷草賽事用C加3欄作賽，由於跑道狹窄，前置馬一向有利。
以最近2月22日賽事為例，當晚總共有七匹頭馬守前四位入直路建功，而且連場有內檔馬上名，其中「敬無極」、「家多福」及「雷公鑿」都係藉內檔之利守貼欄包廂位勝出，具前速之內檔馬值得優先留意。
今戰列陣馬中，角逐第三場四班1200米的「勝在煌」跑谷C加3欄一次即勝，亦係全場唯一贏過此移欄之參戰馬，其練馬師葉楚航安排回配莫雷拉值得睇好。
另外，競逐第八場三班1200米的「秘密武器」跑C加3欄1200米一次即入Q，來自蔡約翰馬房的均速馬抽得二檔好位，結合跑道形勢配上田泰安可坐位望贏。