現年51歲郭富城，入行以來經歷多段感情，最終選擇同自己過下半生嘅，係拍拖兩年嘅上海姑娘方媛(Moka)。
其實城城認定方媛早已有跡可尋，一直對戀情採取寧俾人知，莫俾人見嘅佢，早喺2015年12月一晚深夜，忽然喺微博貼出一幅車廂煙韌拖着Moka嘅玉手相片，高調宣示戀情。
高調晒愛後，雖然城城唔少fans反對偶像呢個決定。不過城城有理冇理，繼續同女友晒甜蜜，之後再貼同Moka嘅食飯照。
同方媛拍拖兩年，感情一直穩定。到舊年8月，城城開演唱會，方媛以女友身份，高姿態嚟港捧城城場。演唱會後，城城仲帶女友見沈嘉偉等好友，認定女友身份。
如今二人簽紙排期結婚，情史多籮籮嘅城城，終於告別單身行列，展開人生另一頁。