提起「政界方中信」，好多人第一個諗到嘅可能係自由黨黨魁鍾國斌，但查實佢只係政界方中信2.0，皆因民主黨前立法會議員單仲偕（單雞），出道冇耐已經俾人話似方中信，政界方中信1.0非佢莫屬。
自小喺葵青區打滾
現年57歲嘅單雞，3、4歲嗰陣都幾有肉地，到咗7、8歲嗰陣，眉宇間已經隱含憂鬱嘅味道，查實一頭濃密短髮，粗眉、大眼，同𠵱家分別唔算大，當時有啲似公仔Monchhichi，點估到大個咗嘅就多咗陣方中信嘅男人味？
單雞家陣住喺葵青區嘅華景山莊，查實佢由細到大都喺呢區打滾，細個係舊葵涌邨居民，中學就讀於葵青區嘅名校聖公會林護紀念中學。而童年時嘅玩樂日子，大家點會咁易忘記？單雞都同八方想當年，話對當年成日同隔籬屋啲小朋友一齊玩，好似打波子、煲蠟等美好時光念念不忘，但隨住大家年紀越嚟越大、加上葵涌邨90年代拆卸重建，同呢班兒時玩伴冇再聯絡咯。
佢亦指那些年唔似𠵱家咁，周圍都係集團式超市，嗰陣買米係要去米舖，之後將啲米放入米缸，雖則話有人會送貨，但單雞不時都幫阿媽抬米返屋企，張舊相見佢左手放喺一個寫住「東莞良田」嘅容器上，嗰個就係米缸嘞！生於斯、長於斯，佢後來又喺葵青區做區議員，成為從政嘅起步點，至今久唔久仲有啲舊街坊搵佢幫手解決地區問題。
