去年落選港姐單文柔早前被《蘋果》爆佢同陳展鵬上山頂喺車廂夜會，雖然展鵬事後死口唔認拍拖，但之後被雜誌影到佢同單文柔一齊行傢俬店，仲有攬腰相，都可以話係鐵正如山，唔少人都話展鵬講大話，但亦有人覺得佢係要保護剛萌芽戀情，情有可原。
其實戀情曝光後，有傳單文柔被大台高層照肺，可能會影響未來工作；但展鵬就好Man，同高層講過會一力承膽，乜事都有佢搞掂，所以單文柔一直好低調，話唔方便回應，連網上都潛埋水。直至前日，單文柔終於更新instagram，透露自己將入兒童節目《Think Big天地》，佢留言「多謝你們呢2日的幫忙同包容，我哋會努力接棒Let's think big。」唔少網友都留言叫單文柔「加油」，不過仍有疑似係展鵬同胡定欣嘅粉絲留咗「豬扒」、「X街」等惡詞攻擊，更有人話﹕「我支持你去兒童組呀，因為同雪藏冇分別。」