特首戰落幕，挺薯粉絲發完場夢可能好失落，但查實無論挺邊一位馬仔，都唔代表傾唔到偈。
八方周日喺特首選舉點票中心，就見到好珍貴嘅一幕，支持林鄭嘅全國政協常委吳光正，同all in曾俊華嘅民主黨幾位選委，排排坐等結果時都不分你我咁密斟，吳光正仲不停望住坐喺佢隔籬單仲偕部手機，好有興趣咁款噃；而再隔兩個位嘅林卓廷同尹兆堅，一樣眼定定睇住部手機。
阿廷傳達唔想有線執笠
八方問過阿廷，佢話佢哋係睇緊傳媒嘅目測點票結果，既然九倉大股東吳光正近在眼前，佢都當面向對方反映，話有線電視新聞做得好好，喺香港算係少有持平兼有公信力嘅傳媒，傳達咗希望有線唔好執笠嘅心願，希望吳光正收到。
單雞話大家都係一齊透過手機睇即時點票結果之嘛，其間自不然會交流下跑馬仔心聲，同時大談潛水同滑雪經，佢引述吳光正話𠵱家好多公司事務已經放低咗，時間鬆動啲，今季滑雪嘅日子多達58日，單雞卸下議員身份後亦不停外遊滑雪同潛水，難怪佢哋傾得咁投契。