球員喺場上冇品插水固然唔可取，但起碼有，球證插水又係咩玩法？喺周日一場巴西里約熱內盧省賽事，法林明高主場同華斯高踢成2:2，其中今季由中超升班馬天津權健回流華斯高嘅36歲老將前鋒路爾斯法比安奴，喺下半場球隊領先1:0嗰陣回防期間情急撞跌對手，食黃牌相當正路，弊在法比安奴抵唔住頸，用心口輕輕撞咗球證安東尼奧施華（Antonio Silva）一下，勢估唔到施華呢個時候「影帝」上身，向後連仆8步咁多，法比安奴心知中伏已太遲，就咁食第二面黃牌被逐，就算拗數都冇用囉。
不過，有巴西傳謀就話法比安奴都唔抵幫，喺收第一張黃牌之後疑似同施華講咗句「你畀牌我？」至於施華除咗插水，又錯判法林明高12碼累佢哋失分，事後亦俾賽會炒魷。