上周四贏咗南韓嘅國足，喺上周六已經抵達德黑蘭，準備周二作客伊朗嘅世盃外，開始喺當地作適應訓練。雖然國足上輪終於贏波，但要晉級決賽周嘅機會仍然唔樂觀，今場對伊朗嘅目標係至少攞一分；亞洲足協仲出文話，如果國足可以兩連勝，打入決賽周嘅機會就會大增。不過，伊朗呢個係地獄主場，而伊朗足協仲好似怕個場唔夠地獄咁，決定出招，話呢場世盃外免費入場，希望坐爆全場，狂噓國足。
呢場波喺艾薩德球場舉行，官方數字話個場坐到近八萬人，但中國傳媒就擔心場波免費入場的話，會有成10萬人入場，因為呢個球場喺約廿年前嘅世盃外，試過容納過近13萬人！如果真係有10萬伊朗球迷入場，國足肯定好難踢。家陣國足喺世盃外亞洲區A組以五分排尾二，落後第三位嘅烏茲別克四分，而伊朗就以14分排緊榜首，小組頭兩名直入決賽周，第三就要踢附加賽。