粵劇伶王新馬師曾（鄧永祥）於97年離世，祥嫂鄧洪金梅與4子女發生爭產風波。早前鄧兆尊因為3位紅顏知己成為城中熱話，祥嫂出席好友魯芬喪禮時嚎哭責子，此舉被指不尊重，實在「失禮死人」。祥嫂昨自拍短片承認的確有失禮，為此鄭重向魯芬家屬致歉：「萬分不好意思，希望公眾能明白我嘅心情，魯芬係我認識多年嘅朋友，佢份人坦率，我好鍾意佢，知道佢病逝，內心好難過。」祥嫂續說在靈堂外聽到一陣哀樂聲，突然感觸：「我一把年紀，再走前一步就到死亡邊緣，但該死嘅唔死，魯芬咁年輕病逝。諗到同仔女不和，我死後可能冇人拜祭，內心突然激動，至會失態失言。」
為祥哥設紀念館
祥嫂坦言經魯芬事件後，對子女觀感和財產分佈有新安排：「名利帶不走，只要子女健康快樂，唔會干擾佢哋生活。我以同祥哥嘅名義成立家族基金，喺律師、醫生、證人見證下寫好平安紙。鄧家子女同洪家親人全部可以得到我嘅遺產，仔女冇隔夜仇，遺產自然會留畀佢哋。」
祥嫂決定把現居的永祥苑，建立「伶王新馬師曾藝術紀念館」，將祥哥生前的演出資料全放於此，祥嫂說：「20年嚟，一直活喺迷茫中，今日我清醒啦，決定好好為佢規劃一切，令人記得世上曾經有過一位粵劇伶王。」
嘲3紅顏年紀大
而兆尊昨晚在中環出席活動，提到祥嫂謂寫好平安紙，他說：「好仔不論爺田地，佢鍾意點處理就點處理。女仔善變能力好強。佢身體一向好好！」問和祥嫂關係會否得到和解？兆尊坦言：「其實個關係唔係由我呢度開始，我係負責調停，我了解過係好小問題，係佢化大咗小小啫！」他亦贊成為爸爸建紀念館。提到被祥嫂指艷福無邊，兆尊笑說：「我啲艷福比較大年紀，唔算係艷福。」
採訪：盧妹
攝影：陳順禎