【2017行政長官選舉】
【本報訊】民意支持度最高卻敗選的曾俊華，昨感謝有選委頂住莫大壓力支持自己，坦言曾自以為可如西班牙班霸巴塞隆拿般能在關鍵時候反敗為勝，「但現實係即使球隊踢得幾好，又有球迷支持，仲不斷入球，都未必能夠一定勝出」，又意有所指稱「每一場波都有茅波」。他呼籲支持者不要氣餒和忘記初衷，要繼續發一個令香港更民主、包容、繁榮、所有人活得更好更快樂的夢，「直至我們的夢想，有一天成真」。
記者：林俊謙
曾俊華昨午在競選團隊支持下召開記招，發表敗選宣言，重申香港當前最需要的是信任、團結和希望，「我相信Carrie（林鄭）喺呢一點上面，諗法係同我一致」。他指認識林鄭很久，雙方也共事多年，認為林鄭是一位非常勤力和能幹的人，「這場選戰唔只改變咗我，我相信亦一定觸動咗佢」，呼籲支持者給林鄭一個機會，協助她履行特首使命，一起捍衞香港核心價值，讓香港變得更好。
「一齊彌補失去嘅5年」
他稱遺憾令提名和投票給他的選委失望，知有選委不認為自己是完美特首人選，但仍然頂住莫大壓力信任及支持自己，呼籲各位以包容態度迎接即將到來的5年，「因為我哋一定要一齊努力，去彌補我哋失去咗嘅5年」。
曾俊華形容今次選舉，他好像和全港人一同發了一個夢，直至昨日終於夢醒，曾俊華堅信，只要香港人若發一個令香港更民主、包容、繁榮、所有人可活得更好及更快樂的夢，「已經實實在在地改變香港」，呼籲港人要繼續「發夢」，「直至我哋嘅夢想，有一天成真」，寄語港人對香港要有信心，「相信一個人，不如相信每一個人」。問到今次民望高企仍然落敗，是否因中央「黑哨」干預時，曾俊華指，今次投票是由選委作出決定，選舉結果全屬選委責任，「唔係其他人（責任）」。問到敗選是否因為有人「打茅波」時，曾俊華笑指：「場場波都有茅波㗎啦，每一場波都有茅波，可以罰波囉，有penalty（罰球）」，笑指自己已踢「罰球」，「不過有啲波入到，有啲入唔到咋嘛」。曾俊華其後被追問是否敗在中央出手干預選舉時則表明：「我冇理由相信北京干預選舉，因為我冇任何證據」。
早前曾經在法律界論壇上，力斥對手林鄭似獨裁者的曾俊華，昨被問到會否對香港前景感到擔心時指：「我希望如果佢（林鄭）係一個獨裁者，會係一個和善嘅獨裁者，可能好似李光耀（已故新加坡前總理）講過，係最有效率嘅政府」。
盼林鄭努力與泛民溝通
被問到未來會否留在政壇，為爭取民主出力時，曾俊華坦言暫未想過，「畀我瞓番幾日，我或者會有答案，又或者冇」。問到會否參加今年7.1遊行， 曾俊華則未有正面回應，只稱：「我7.1唔知會唔會旅行緊，太遠嘞。」至於會否憑現時高民望，參選稍後舉行的立法會補選時，曾俊華聽罷即笑說：「我唔想做Regina（葉劉淑儀） 2.0呀」，引來台下傳媒一陣笑聲。
選舉結果反映林鄭缺乏泛民選委支持，曾俊華認為，林鄭在泛民獲得的支持較低，認為林鄭未來要努力與泛民溝通，希望雙方能找到更多共通點，「如果一個人勝出（當選特首），但冇整個政治光譜支持，施政就會困難得多，呢個係實實在在嘅問題」。
