港足上個禮拜四友賽吞咗約旦四隻光蛋後，大軍噚日下晝已經起程去咗黎巴嫩首都貝魯特，為聽晚作客黎巴嫩場亞盃外展開最後備戰。港隊教練金判坤過去兩日取消操練，又安排球員出去遊覽，前晚復操仲縮短咗訓練時間，不過，大軍噚日到到黎巴嫩就即操。
港隊踢完場友賽約旦後，安排球員外出遊覽，唔少球員好似基藍馬（圖）同李毅凱都喺fb晒啲遊覽名勝相片；大軍到前日黃昏先復操，教練阿金解釋，近排有啲球員比賽較多，又有啲比較少比賽，操練放緩吓，到聽日挑戰黎巴嫩應該有足夠新鮮感同狀態應付。
阿金總結今次喺約旦集訓及友賽就話獲益良多，呢句又真喎，因為港隊好難得有機會拉隊去西亞集訓，適應西亞天氣同時差，仲有機會同黎巴嫩實力好接近嘅約旦拍跳，等球員知道對呢個級數嘅球隊係乜嘢速度行軍同有幾壓迫。
港隊同約旦拍跳之餘，亦有分析黎巴嫩踢法；另外，早前受傷嘅隊長葉鴻輝，已經復操，聽晚應可正選領軍。港隊噚日下晝起程去貝魯特，到埗後把握時間即操，今晚就會喺卡米爾體育場進行賽前操練。