【爆相爆片】劉愷威與內地女星楊冪結婚3年，雖然已誕下女兒小糯米，但兩人的婚姻一直被傳不穩，有指女方數度與內地男星李易峰關係密切，而劉愷威去年底亦傳出搭上內地女星王鷗，不過幾位當事人都公開否認。外界亦一直不看好二人的婚姻，曾經有報道指楊冪是惡家嫂，與老爺劉丹關係麻麻，甚至經常傳出婚變的消息。夫妻二人也曾在微博公開發律師信，表明會對造謠者追究法律責任，但一樣平息不了婚變傳言。
「媽咪冇乜幫手」
暫且不理傳言孰真孰假，但劉愷威與楊冪十分疼錫囡囡小糯米，兩人日前難得合體現身香港，陪小糯米出席學校親子運動會，一齊做運動。日前讀者李小姐透過本報的「爆相爆片」，分享前日遇到楊冪與老公劉愷威一起現身香港，陪住囡囡出席維多利亞幼稚園的親子運動會相片，但兩夫妻似乎交流不多，李小姐表示：「佢哋兩公婆同埋爺爺劉丹及嫲嫲一齊去咗運動會，呢個運動會下晝先舉行，我大約喺2點幾左右見到佢哋，好多項目主要都係爹哋落場玩，反而媽咪企埋一邊冇乜點出聲，亦都冇乜點幫手。」
頭耷耷好避忌
劉愷威與楊冪兩夫妻在內地知名度甚高，問到當日二人有否引起其他家長注意，或主動與其他家長交流一下？李小姐表示：「唔多喎，佢哋戴晒cap帽，又成日都耷低頭，全程都有啲避忌，似乎唔多想俾其他人見到。」問到以前有否見過楊冪出席學校活動？李小姐說：「我哋都係第一次見，通常都係見到嫲嫲或者爹哋湊，所以我自己都忍唔住影低。」
日前有網民在微博貼了楊冪現身南京母嬰院的相片，又傳出她大肚消息，不過楊冪工作室與老爺劉丹都代她否認，其實楊冪與劉愷威聚少離多，經常都是各有各拍劇，要生多一個小孩確實不易。
撰文：鍾國仁