過去禮拜六最有星味嗰場波，唔係世盃外，而係喺晏菲路舉行嘅慈善賽，由利物浦元老隊對皇家馬德里元老隊。謝拉特大發神威，製造咗四個入波，幫紅軍贏4:3。利物浦喺fb度直播場波，唔使錢就有得睇，好多球迷都留言叫謝四不如復出踢一隊啦。
呢場利物浦個陣好有睇頭，除咗有退役冇耐嘅「神奇隊長」謝拉特，仲有麥馬拿文、科拿、夏文、路爾斯加西亞、懷斯、丹尼爾艾格、杜迪克同加歷查等一代球星。至於皇馬就有費高、卡路士、施多夫、沙加度、摩連迪斯等。36歲嘅謝四上年先掛靴，可以話係狀態最好嘅球員，主宰紅軍嘅進攻；佢先喺上半場傳中畀奧雲頭槌入波，換邊後再傳畀艾德列治撞射入空門，幫紅軍拉開到2:0。
炮製四球 費高都畀like
謝四呢場除咗傳波，仲有遠射同突破，佢先整腳30碼遠射中楣，之後仲闖入禁區博到12碼，由科拿射成3:0。去到78分鐘，最期待嘅畫面終於出現，謝四接應傳中轟入成4:0。雖然紅軍臨尾失三球，但最後都以4:3贏出呢場慈善賽。當然，勝負其次，為善最樂，而且可以睇番一班昔日球星踢波，唔少網民都話好感動，搵番以前睇波嘅青春，仲好多謝利物浦同皇馬踢咗場好波㖭。
謝四呢場八面玲瓏，獲選為最佳球員，賽後就有網民呼籲佢復出，例如網民Tristen Gardiner喺紅軍fb度留言：「點解謝四唔係仲踢緊利物浦？」引嚟幾百個like，有回應話多得前領隊羅渣士囉。
除咗謝四，球迷都大讚艾格同杜迪克，仲喺fb提醒領隊高路普，呢堆球員全部都唔使轉會費㗎！當然，亦有冷靜派球迷話，慈善賽節奏慢，謝四先至踢得咁好，但都叫家陣班一隊球員學吓嘢。皇馬嘅費高賽後都笠謝四高帽，話球員生涯好遺憾未同謝四做過隊友。
澳my god！曼聯元老被炒
除咗利物浦同皇馬，曼聯嘅元老隊喺上周六都有比賽，佢哋去咗作客澳洲元老隊，結果輸咗0:3。當然戰果唔重要，最緊要睇球星，呢隊曼聯元老隊有史高斯、白賴仁笠臣、普波斯基、約基同沙夏㗎！
