內房股SOHO中國（410）上周四舉行記者會，當時主席潘石屹被追問點解暫緩變賣資產時，自爆受外滙管制影響而決定停止出售虹口SOHO。但事隔一日即反口，公司官方微博話係「媒體報道與實情不符」，協商取消交易，係因買家無法按協議要求，完成對外投資的審批備案手續喎。
外滙管制向來都係中國不能說的秘密，但潘主席當日似食咗誠實豆沙包，猛話對方係好出名嘅公司，且協議、條款都傾好，想埋位簽合同架啦，點知最後商量完卻決定唔賣，搞到對方「很惱火」。
對方嬲嬲豬，潘主席話自己特登寫封信去解釋點解「變卦」，原來佢本來想將賣樓所得滙到境外分紅，但「現在國家管人民幣、管外滙，這錢不能出去」，又指揸人民幣現金後無處可投，寧願租金回報率低啲，但揸樓好過揸人民幣咁話，希望對方理解，當時公司總裁閻岩仲搭話「（他們）這就理解了」。
華華唔知潘主席係講大咗，受到壓力定點搞到要反口，但堂堂主席都應該為自己言論負責呀，記者都有腰骨，唔係話屈就屈㗎。