遲嚟先上岸，贏馬又有雷神份！
雷神莫雷拉約十四個小時前，於昨晚（25日）於杜拜美丹馬場，夥拍日本隊「強擊」勝出杜拜草地大賽，隨即上飛機趕返香港參戰今午（26日）沙田日賽。
結果呢位神級騎師今日首匹座騎，第三場三班1000米直路賽徐雨石馬房之「皇龍大將」，即大熱門建功，該駒打開今季勝門，單Win及組合獨贏A1分別派24.5及19元。
因應航班情況，冇咁快返到香港，雷神在今午沙田頭兩場都冇份跑，第三場至開始上陣，結果佢騎番上季尾由自己贏過同班同程的「皇龍大將」，克服直路賽3檔劣勢，一早已移到外欄位置，守在四、五位之間，末段以較佳走勢力壓新勝馬蔡約翰馬房「駿明珍寶」建功，人馬近兩次合作贏晒，默契可見一斑。
「皇龍大將」馬主是藝人曾志偉老友區啟光與區希敏，賽後一位貌似女藝人黃心穎的年輕女子黐住區啟光拉頭馬，未知她是否就是區希敏。
徐雨石說：「『皇龍大將』今場負133磅都幾辛苦，好彩鞍上人是莫雷拉，不會步韻亂晒，算好好彩。」區啟光說：「『皇龍大將』排三檔跑直路賽並非好檔位，好彩在雷神壓陣，他走位一絕，希望牠加分後在二班遇弱組，由於二班1000米直路賽不多，可能會轉跑谷草二班短途。」
「駿明珍寶」影相飲恨做二奶，未能完成三連捷，三、四名分別為「舖舖旺」及「快寶駒」，四重彩派5,901元。