新亞師兄W嫁女，女婿係法國人，3月18日中午在科學園一間意大利餐廳設招待會，餐廳叫做Meraviglia，據講係wonderful咁解（意大利廚師話嘅），位於科學園二期河畔，隻地標金蛋隔籬，好容易搵得到。呢間餐廳勝在有人造河景，室外河畔坐籐椅，別有風情，香港區幾難搵到咁嘅寬敞環境。後來省起，呢間餐廳老闆之一係中大逸夫書院師弟、十大傑出青年林曉鋒博士。
科學園雖則位於沙田與大埔之間，但好多人未去過，法國新郎在跨國機構工作，來港已有七八年，有資格成為香港永久居民，以前《金融時報》報導過，自金融海嘯之後，好多法國人移居香港，相信師兄W嘅女婿係其中之一。世姪女身高貌美，自幼讀英基學校，到美國留學，再回港入中大讀MBA，如此可人兒竟嫁與法國郎君，本港男子走寶矣。新郎致辭時，有一段多謝佢嘅同事「第一次自港島冒險渡海越山（獅子山）而來沙田科學園，好多謝！」都幾幽默，其實人人到過科學園都喜歡呢度嘅環境佈局，在此返工，享受園林之勝，勝過在中環人車爭路，吸入懸浮粒子。
證婚律師又係新亞師兄，律師T是也。律師T最近幾年，證婚無數次，多到佢自己都唔記得，但始終未曾在結婚證書上以家長之名簽字，曾經問過佢：「喂，乜你位公子仲係最有價值王老五呀？」律師T嘅標準答案係：「有冇好介紹？」其實T公子係港大法律學院高材生，未畢業已被倫敦大行聘請，一離開大學堂就去咗中環返工，早已成為不少大學生羨慕嘅IPO，收購合併律師，薪水優厚。不過呢，年青律師嘅現實生活梗係冇王迪詩筆下咁浪漫㗎嘞，日日做到三更半夜，根本難以知道情是何物，但律師T冇理由叫自己個仔唔做威水大行律師嘅啫，唯有一味等飲新抱茶！哈，估唔到T公子卒之認為做到夠晒皮，自願辭職而去加入一家上市公司做in-house法律顧問，現在可以每日七點前放工嘞，有時間拍拖喇啩，希望律師T師兄可以在結婚證書上簽名在家長一欄啦。律師T話呢件事，最緊要順其自然，急唔嚟，估唔到嘅，正如我地以前點會諗到師兄W嘅港姐級漂亮女兒會係嫁與法國郎君嘅啫。律師T不談這事，忽然問：「喂，呢排我多咗好多按揭做，樓市可以旺到幾時呀？」佢問我我問邊個？不過第二日會見到施永青，應承同佢問吓。律師T在1997年初曾有一個本身紀錄，就係為藍田地鐵站上蓋匯景花園一個住宅單位一日之內做七次comfirm-mor，收費收到佢笑，但亦因此知道，樓市就快爆破了！