【本報訊】林鄭月娥的競選團隊不乏資深公關，包括有中電公關前一姐麥黃小珍，及曾任港台廣播處副處長的戴健文，卻頻生「關公災難」，連林鄭月娥也公開讚揚對手曾俊華的得力助手羅永聰，自嘲要招攬羅永聰加入自己的團隊。中文大學政治行政學系高級講師蔡子強認為：「成個團隊拉雜成軍，將多過兵，仲係升晒上神枱，掌握唔到時代脈搏。」
不熟悉林鄭 欠缺互信
林鄭競選辦團隊還包括馬會前對外事務高級經理陳裕宗、前港鐵總經理王美琪、信和集團公關高層邱文華等，可惜卻製造連串關公災難，例如林鄭於年三十竟然向懷疑內地行乞黨送上500元等事件。
蔡子強認為，明顯林鄭競選團隊組成臨急就章，完全不了解老闆能耐，又欠缺互信，「佢哋根本唔熟悉林鄭，唔知道佢識啲乜，可以做到啲乜，咪出現好多問題」。
另外，林鄭競選辦設立傳媒聯絡WhatsApp群組，卻遭傳媒指對查詢不聞不問不回應，最終團隊成員麥黃小珍在群組致歉，但竟然用簡體字。浸會大學新聞系高級講師呂秉權同意林鄭月娥的團隊將多兵少，「（團隊成員）已經好少落手落腳去做，有啲生銹；仲要唔係100%真心去做，係有啲被迫，大家唔信任，所以好多甩轆」。
呂更擔心，林鄭個性自傲，亦有可能出現忠言逆耳的情況，「佢根本唔聽人講，如果佢做咗特首，好擔心做咗第二個CY。不過林鄭係公務員系統出身，應該駕馭到公務員嘅」。
■記者蔡朗清