數劉愷威嘅代表作，《真情》都可算係其一，佢喺劇中飾演中心人物「叉燒炳」（劉丹飾）同「善姨」（李司棋飾）個細仔，喺劇中最多戲係講佢同Joan（鄺文珣飾）及津津（梁珮盈飾）之間嘅感情線。《真情》喺1995至1999年其間播足4年半，好多卡士至今仍有活躍娛圈。
劉丹
劉丹憑「叉燒炳」一角深入民心，而佢喺《真情》之後，拍過處境劇《皆大歡喜》、《畢打自己人》、《愛‧回家》系列等，而喺其他連續劇都可以搵到丹爺嘅影子，包括《酒店風雲》、《律政強人》，到仲未播出嘅《不懂撒嬌的女人》等都有佢份。
而丹爺平日除咗拍劇同湊孫「小糯米」外，更忙嘅就係做「代言人」——幫劉愷威同新抱楊冪做回應，因為劉愷威同楊冪不時被指婚姻亮紅燈，又傳過楊冪整容，傳媒搵唔到當事人回應，就轉向丹爺埋手，所以丹爺都唔係好得閒，重點。
于洋
于洋喺《真情》中做好姨（薛家燕飾）第二任丈夫、有「大小便」暱稱嘅高山青醫生，喺完成該劇後，參與咗逾80套無綫劇，包括早前嘅《洗冤錄II》、《秀才愛上兵》，到近年較hit嘅《幕後玩家》、《致命復活》等，而佢最新作係未播出嘅《平安谷之詭谷傳說》，同劇仲有陳凱琳同黃浩然等，另有《天命》嗰啲新劇都有于洋份！
盧慶輝
喺《真情》飾演立生嘅盧慶輝，於2011年喺深圳迎娶小富婆小青，近年回歸為王晶監製嘅新劇開工，目前定居珠海，間中會出席活動。
鄺文珣
喺《真情》內飾演劉愷威女友嘅鄺文珣，曾與劉愷威戲假情真，佢喺06年同商人應德榮結婚後息影，現為兩子Cadence及Casper嘅媽媽。鄺文珣早排為咗支持慈善機構「海星計劃」，唔單止出任大使，更開金口獻唱活動主題曲《拾星的人》，仲搵嚟老友孫耀威幫手監製。