由中央操盤嘅特首戰，終於圓滿落幕。雖則兩三個月嚟新聞報道充斥住嘅，唔係林鄭就係曾俊華，有時加埋胡國興炒熱吓，但其實對1,194位選委以外嘅300萬選民嚟講，呢場大龍鳳都係食花生居多。
除咗呢幾位入閘主角，成就呢場有笑（唔好話你冇為林鄭辳爆事件笑過……）、有淚（入唔到閘嘅葉劉已經完美示範啦！）花生騷嘅，至少仲有九樣人與事。
八方總結選戰，嚟個大盤點，唔知更好前路會唔會在明天？
薯片奶粉葡萄爆食品戰
記得2012年嘅特首選戰，成個動物圈大決戰咁，又狼又有豬，陪跑何俊仁則係白鴿黨象徵，地上走與天上飛，都係志在千二人小圈子嘅嗰張飛。五年之後，市民口味唔同咗，由動物變成食品戰，唔知會唔會令人嗒落更有味？
曾俊華嘅品客薯片叔叔造型同親切個性，令到全城落單；有官場奶媽之稱嘅林鄭月娥，則有西邊強力部門幫拖，建制牌奶粉源源不絕；入唔到閘嘅新民黨主席葉劉淑儀呢，因屢批妹妹林鄭而被冠以葡萄儀。三樣食品喺近三個月嘅選戰期間，已經成為候選人代名詞，唔知大家有冇因此食到滯？但肯定為呢場選戰帶嚟經典，易於入屋成為合家歡之選。
官場好打得 撲廁紙四圍騰
買廁紙原來係學問，大家覺唔覺得係天方夜譚？林鄭宣佈參選後一直係大熱，勢估唔到喺官場中被認定好打得嘅佢，走番入民間係咁鬼「唔得」？唔知係咪想凸顯自己已返回尋常百姓家，佢自爆搬出政務司司長官邸後發現，租住緊嘅服務式住宅冇廁紙，夤夜搭的士去便利店買，點知發現……原來係冇廁紙賣喎，最後要返回官邸攞。
唔少人對林鄭「另眼相看」，網民笑到佢面黃，但恥笑過後都有個好處㗎，因為有網民搜索過，有啲7仔便利店真係有廁紙賣，多謝林鄭幫忙開心大發現。
成報抗西邊太陽夠硬淨
今屆特首跑馬仔，八方發現，唔少人最常拜讀嘅係《成報》，無論建制或民主派選委，每朝都將《成報》頭版睇一睇。《成報》批評林鄭力度，比民主派報紙更有勁，例如1月曾以頭版形容林鄭係「梁振英繼承者」，獨行獨斷自視過高，其後都多番指斥西環干預選戰，極力為林鄭拉票；唔知係咪追打太得力，《星島日報》同《大公報》等親中報章曾經喺2月中報道，《成報》董事局主席谷卓恒被國際刑警發出「紅色通緝令」。但一如薯片叔，《成報》面對強力部門打壓，依舊打不死，認真不可思議咯。
奪最佳新人 肥聰上跑道
就算錢係萬能，都唔一定搶到賢能。幾時都話，班底好重要，重要好到敵陣都知道就認真厲害。好似曾俊華嘅前政治助理羅永聰，2012年離開傳媒界投入薯片叔懷抱，去年12月仲跟埋老細辭職走人，繼而幫佢做選舉智囊，網上同地面戰都一一網羅。就連林鄭對呢位38歲政治人才都熱情款待，竟然喺選舉論壇公然「挖角」，話若然當選可以請阿聰過檔，令阿聰人氣急升，估唔到反畀機會佢顯身價，翌日拍片撐阿Sir，薯片叔接波話團隊用錢都買唔到，政界中人極關心，呢位年輕醒目仔之後進軍邊條跑道？
林狗玩電話 connect那些年
90年代，軟硬天師紅極一時，節目《老人院時間》嘅玩電話環節，真係改寫咗廣播界玩人嘅歷史，估唔到，薯片叔竟然再次帶起呢個玩電話潮流喎。
以「團結」為選舉口號嘅薯片叔，全程主打「曾．Connect」。要同人connect，最好梗係開吓聲，所以不時紆尊降貴致電各界人士；而佢嘅connect對象仲包括硬天師林海峰，由是但噏嘅林狗做啦啦隊，打電話畀薯片叔隔空過招，唱雙簧寸爆豪裝官邸嘅新財爺陳茂波，畀機會大家緬懷吓那些年，風趣幽默唔小器，就係港人嘅賣點。
英語新世紀 all in最smart
五年前嘅特首選舉，有幾個英文字好經典，就係簡單得嚟又意義深遠嘅「ABC」（Anyone but CY）。
至於今次都有唔少英文可以學到，例如辦公室枱面較為乾淨，可以形容為work smart（嗱，唔等於唔work hard㗎），但令人印像更深嘅，相信非all in莫屬。
薯片叔成功入閘後，民主派界別選委幾乎逐一輪流表態全投薯片叔，你all in完佢all in，當社會咁多嘢都難有共識之時，估唔到民主派選委投票意向咁鬼一致，而民主派罕有好自願咁團結all in，或者會令建制派葡萄到人都癲？
勤力新準則 枱頭擺啲乜？
到底點樣先至係衡量一個人勤力與否嘅標準？原來林鄭嘅準則，係睇吓當事人嘅工作枱，係咪夠乾淨。
「你張枱，有冇file同埋紙張呢？」林鄭喺一個選舉論壇中話，當年任發展局長時去過曾俊華嘅辦公室，每次都好羨慕，「枱頭冇file、冇紙張」，自己就做唔到，因為有大量文件要處理，明寸薯片叔hea住做。
林鄭似乎低估自己嘅不受歡迎程度，唔少薯粉即時貼相聲援，正如薯片叔所言，「唔單止要work hard，仲要work smart」，唔少枱面都好乾淨，包括國家主席習近平張枱，唔通林鄭夠膽話習大大無事忙？
689執包袱 轉頭升呢2066
呢場薯粉對奶粉大龍鳳，真係要多得一個人，成場選戰特首梁振英都起關鍵作用，仲帶來唔少做戲先有嘅衝突感。
突然被阿爺DQ，已經掀高潮；如果冇佢，林鄭亦唔會獲封CY 2.0，當佢大讚林鄭有擔當而冷待葉劉，相信估唔到令葉劉哽咽大控訴。之後屢屢向薯片叔放暗箭，反而凝聚到更多人挺曾，但外界又點估到，成為中央棄將嘅佢竟憑2,066票升呢全國政協副主席……
CY身上事，好似都有啲不可思議，包括2012年夾硬入閘又得咗，唔知往後又點？例如UGL單畸士……
被遺忘的名字—胡世全
想選特首嘅人，豈止入閘嗰三個。除咗葉劉、長毛，仲有一個被遺忘的名字。退休法官胡國興宣佈參選後，前民建聯成員胡世全已經喺荔枝角一間酒家開記招話要選，57歲嘅佢有別出心裁嘅政綱，包括全港推行富人思維，提升市民學習理財之道同知識增長等，又話上任後會全民派錢一萬蚊，以及提升全民健康。查實佢2012年已經宣佈過要選特首，當年一張提名都攞唔到；今屆再戰，相信情況同當年不遑多讓。如果由市民提名就可以入閘，八方相信以佢全民派一萬蚊嘅政綱，未必冇機會跑出㗎！
李八方