喺足球場上，有啲畫面真係隔住個mon都覺得痛，就好似上周五嘅世盃外，愛爾蘭隊長史密斯高文俾威爾斯嘅尼爾泰萊踢斷腳，清楚見到泰萊鏟完之後，史密斯高文右小腿就變形彎咗！泰萊咁凶狠，自然被逐離場；威爾斯呢場都踢得幾狼死，好似加里夫巴利都試過以類似動作鏟埋奧沙度，好在奧沙福大命大冇事，而巴利就被罰黃牌，嚟緊下場世盃外同泰萊一齊停賽，威爾斯主帥高文頭痕嘞！
泰萊領紅 巴利狼鏟
史密斯高文斷腳呢幕喺69分鐘出現，佢同威爾斯左閘泰萊爭波，早一步趕到，踢走咗個波，但佢就硬食咗泰萊嘅飛鏟，右腳斷咗，痛苦倒地。當隊醫入場幫史密斯高文檢查時，愛爾蘭前鋒沙恩朗跪喺高文隔籬攬住佢，一面安慰佢，一面遮住高文嘅視線，等佢唔好望到隻斷腳；呢一幕相當有愛。愛爾蘭教練奧尼爾賽後證實呢位愛華頓右閘斷腳，「史密斯去咗醫院，醫生證實佢斷咗腳。呢個對佢係重大嘅打擊，佢今季踢得好好，係我哋愛爾蘭重要嘅球員同埋隊長。佢嘅受傷係我哋同愛華頓嘅壞消息，我希望佢可以盡快克服傷患復出。」史密斯高文呢種重傷，肯定收「咧」，好大機會要唞一年半載，相信出年先見到佢。
威爾斯出線現危機
至於罪魁禍首尼爾泰萊就被罰紅牌，賽後威爾斯主帥高文話泰萊好沮喪，「呢吓鏟波的確肉酸，但泰萊唔係嗰種球員，佢自己都經歷過重傷。」喺史密斯高文斷腳前一分鐘，威爾斯仲有吓凶悍攔截，主將加里夫巴利一嘢鏟落新特蘭守將奧沙度，好在奧沙冇事，而巴利就被罰黃牌。被問到巴利呢吓犯規，高文話：「我坐喺度睇，見到巴利係去波嘅。巴利想為呢張黃牌上訴，我要再睇吓點。」巴利喺世盃外累積兩面黃牌，下場作客塞爾維亞要同泰萊一齊坐波監。
愛爾蘭右閘史密斯高文慘情，威爾斯主帥高文就煩惱，呢場比賽最終踢成0:0，威爾斯喺歐洲區D組以七分排第三，落後頭兩位嘅塞爾維亞同愛爾蘭四分，下場大戰塞軍仲要冇兩個主將，如果再輸，睇怕威爾斯都冇乜機會打決賽周。