女子桌球世錦賽冠軍吳安儀噚日喺香港出戰桌球精英邀請賽嘅性別大戰，先喺個人賽16強以3:2淘汰潘正潮，但喺八強就以1:3輸畀陳靖康出局。
16強嗰陣，安儀入局較慢，對住小將潘正潮連番錯失機會，先輸兩局；去到第三局，「四眼cue后」先如夢初醒，最終連攞三局反勝。賽後安儀笑笑口話同決勝局好有緣，成日都打到最後一刻先贏到。不過佢八強就輸畀陳靖康，仲話自新加坡返嚟後對桌球有少少生疏，「休息咗幾日，感覺都有生疏，要逐步練番。」另外，安儀亦夥拍李俊威出戰世界冠軍潮拍賽，對戰馮國威同溫家琪，最終安儀組合輸1:2。女雙好拍檔家琪突然變做對手，安儀話明明前幾日仲一齊攞最佳組合，感覺幾搞笑喎。
家琪都有參加個人賽，但就喺16強直落三局不敵「傑青」得主張家瑋出局。家琪噚日把聲沙晒，原來帶病上陣，「喺新加坡返嚟後攰得滯，有啲唔舒服，會盡量休息，預備四月頭去英國比賽。」不過安儀就話自己抵抗力強，唔怕俾家琪傳染！
