【本報訊】「你同我傾完偈，會唔會驚？」訪問完結，合上採訪簿，41歲的阿邦（化名）這樣問。身形高大健談，阿邦不像所謂「鹹濕佬」。但曾幾何時，他是偷拍狂，在街上遇到衣着性感女性，會有無限聯想。「朋友話某個女星性感，會批評番轉頭，其實係怕俾人知我原來係咁」。原本在公營機構任督導，平日道貌岸然，卻4次犯風化案被捉，兩次入罪，妻子震驚求去，就連他亦不能接受這樣不堪的自己，一夜間賠上工作和尊嚴，一無所有。
「隱蔽咗近一年，覺得全世界都笑我」。中學讀男校，六兄弟姊妹之中排最細，生於嚴肅家庭。「父母都規行矩步，電視播親熱戲，錫吓嘴都會唔出聲、一係行開」。男要目不斜視、女要冰清玉潔，明明好色，越壓抑越不可收拾。「小學試過偷窺女仔沖涼，知咁樣唔啱，但會說服自己，青春期個個都係咁，其實知係呃自己」。隱約覺不妥，無諗過正視，因人人都說：「男人都係鹹濕。」
第一次犯案是2006年，剛30出頭，有固定女友，還準備結婚。「喺天橋上面摸個女仔，死口唔認，證據不足告唔入」。驚一輪收手又再犯，每次都同當時的女友即後來的太太講大話，一時說和人打交、一時說被屈。2010年，第4次被拉，在地鐵影人裙底，剛下班的同事目睹經過，東窗事發。「我太太同我同一間公司做，件事即時通天」。
事發後兩個月，太太向他提出離婚，未及上庭，公司要求他自動辭職。「因為有前科，被判入獄兩個月」。失足跌入深淵，眾叛親離。「唔敢搵朋友，每日都好怕新聞會報」。像「活死人」的生活，他過了一年。傷害了愛自己的人，自覺被世界遺棄，認定自己是無可藥救的變態佬。「猛問發生咩事，點解搞成咁」。連自己也答不上。像遇溺的人，人生第一次，他想到求助。
「好色唔代表可以夾硬嚟」
「致電朗天嘅熱線，想講又唔敢講晒，怕對方唔接受我」。會見心理學家，參加小組治療，在這裏他看到很多和他生命軌迹相近的人，他開始重新學習面對自己、學習自處，最重要是學習尊重別人意願。「鍾意踢波，唔代表要踢人」。他甚至在記者面前承認自己好色：「以前根本接受唔到咁樣嘅自己，但好色唔代表你可以夾硬嚟，唔理其他人感受」。人到中年，認識自己的過程代價沉重，重新被接納，讓他看到曙光。
「我知道唔會因為我心境改變，其他人對我嘅睇法會跟住改變，但一齊面對問題，就有力量」。重拾人生的價值，他更向前妻真誠道歉。「我知傷害咗佢，令佢好難受」。阿邦直言感覺反而比以前自由。「以前要努力裝扮成另一個人，𠵱家至少可以做番真實嘅自己」。痛定思痛，不強求破鏡重圓，但也不介意由低做起的他說。
■記者呂麗嬋