中國隊有長沙呢個福地，西班牙就有希杭嘞；上周五西班牙主場以4:1大勝以色列，就喺希杭莫利奴球場上演，西軍喺呢度已經累積咗10場不敗，係國家隊單一球場計最長不敗紀錄。講番比賽，西班牙嘅英超兵就大勇，曼城中場大衛施華先開紀錄，亦係施華仔第29個國家隊入球，壓過希亞路升上西班牙歷來射手榜第四位；車仔前鋒迪亞高哥斯達今場亦有一球進賬。「狂牛」大勝後，繼續喺世界盃歐洲區外圍賽G組以四勝一和壓住意大利排榜首。
法比仔睇戲叉電
不過冇得代表國家隊都未必係壞事，起碼呢個星期有假期，好似曼聯中場桑馬達，就可以去柏林旅遊一番，仲着到好斯文扮晒文青㖭。車路士中場法比加斯，就帶住老婆同兩個囡囡去睇電影，叉足電喺餘下比賽幫車仔守住英超榜首都唔差。