到底，奇蹟會唔會出現？等多一日，自有分曉！其實每逢選舉前夕，政壇都有唔少飯局賭盤湧現，去年底「勁草」梁振英突然被中央DQ，唔畀佢參選連任特首，除咗搞到成地眼鏡碎，亦令唔少扒冷者贏咗幾餐飯。
至於呢戰，據聞亦惹嚟唔少政界中人開盤，除咗好正路嘅林鄭係咪勝出呢個熱門盤，亦有其他，包括到底林鄭係以高過定低過689票勝出，以及去唔去到中央想要嘅750票指標呢？嗱嗱嗱，查實呢啲估算都係大路嘢，有啲政界中人就玩另類，唔賭林鄭攞到幾多票，覺得大局既定下，結果係點都唔多有趣，反而推出另類盤，主角就係大冷門胡國興。據聞有人打賭緊，胡官最終得票有幾多？八方聽聞，個位數嘅盤都好受追捧，唔知胡官會唔會帶挈呢班人有餐飯食呢？
而八方相信胡官至少有一票，因為社福界選委莊陳有話胡官嘅政綱同佢比較接近，所以票投胡官。