眼見本來嘅選戰勁敵曾俊華人氣盛民望高，反之自己則被中央勸退冇得冧莊，特首梁振英心裏面嗰股怨氣，肯定夾雜唔少葡萄味，佢噚日出發去海南出席博鰲亞洲論壇前忍唔住回應跑馬仔選戰，當然借勢向薯片叔放箭，話對候選人嘅要求係政綱細節，而唔係純粹睇民望，以自己5年前冇獲泛民選委all in為例，質疑點解今屆係咁呢？事實上唐唐話佢「你呃人」，真係冇錯，睇番數據就一清二楚。
話說梁振英噚日話自己上屆係參選人中民望最高，「但係呢泛民嘅選委亦都冇投票畀我」，故今次300位泛民選委若all in民望最高候選人，「5年前點解唔將所有啲票all in投晒畀我呢？」繼而指泛民應該解釋，之後轉身離開。
睇番吖，上屆選舉泛民派咗民主黨何俊仁入閘，同今屆3位候選人都係建制候派好唔同，而當年有逾22萬市民參與嘅港大民意研究計劃嘅「3.23民間全民投票」，結果係有約12.2萬人投棄權票，支持流選，比率高達55%，而當年3名候選人梁振英、唐英年同何俊仁得票率分別只有17.8%、16.3%同11.4%，絕非梁特自稱「民望最高」，因為最多人係撐流選。
又踩薯片空談房屋政綱
梁特噚日亦暗踩曾俊華嘅房屋政綱只講願景，欠缺政策扶持，仲揶揄話：「我相信同我哋每年一度過農曆年講『恭喜發財』一樣，講咗之後又點呢？係咪講得多就等於袋裏面有多啲錢？」佢話喎，人人都可以提出良好願景，但作為特首呢，就應該提出理念、政策、時間表同具體措施去落實，「咁你（制）定政策一定要有時間表吖嘛！如果你冇時間表嘅話呢，根本講咗等於冇講，然後要有具體措施，啲地喺邊度嚟？使得可以有60%人住公營房屋？所以呢度至少有4個層次」，重點都係叫選委睇番邊個候選人真係交到功課喎，葡萄味真係好濃呀！
白鴿黨鄺俊宇噚日都諷刺梁振英應改名「葡萄英」，話港人全力撐曾係希望逆轉勝，「點解曾俊華民意高？就係因為梁振英乞人憎」，指有關言論變相係幫薯片叔拉票噃。
李八方