如果你同八方一樣，時裝嘅嘢只係識條鐵，呢個展覽可能幫到你！以巴黎為總部嘅時裝雜誌《A Magazine Curated By》，經常探索時裝設計師嘅創作世界，邀請過唔少國際時裝設計師擔任客席編輯，舊年就邀請GUCCI創作總監Alessandro Michele出任客席主編，以「Blind for Love」主題編製出第16期獨家內容。
香港為首站
原來GUCCI會同呢本雜誌喺3月至5月搞埋藝術展，即日起喺香港打頭陣，之後再去北京、台灣。展覽包括三部份，其中會將《A Magazine Curated By Alessandro Michele》部份出現過嘅物件及圖像，立體呈現，仲以「百寶箱」（Cabinet of Curiosities）展廳形式展示。另一部份，展覽有投影廳播放影片呈現Alessandro Michele美學世界，令參觀人士好似置身於雜誌篇章。
最後一部份則係展出拍攝唔同背景女性嘅照片，香港首站就展出加拿大90後女藝術家Petra Collins喺匈牙利布達佩斯拍攝嘅私人家庭照片。香港站展覽周日就完，港女粉絲朝拜記住要預約導覽呀。