經歷一輪飛機大戰，In Arsene We Trust之聲似乎佔上風，繼多間英國傳媒聲稱阿仙奴已經向今夏約滿嘅領隊雲格開出新合約，西班牙左閘蒙利爾受訪時亦證實相關消息，就等雲格動筆簽約咋！
蒙利爾表示：「目前的確係艱難時刻，我相信大部份球迷仍然支持雲格，但有少數球迷唔同意，並透過示威表達訴求。球員會同雲格並肩作戰，佢有最後話事權決定去向，因為據我了解，球會已經開出新合約。」另外兩位槍手亦喺同日「發功」，伊禾比話「球迷應該要對雲格有多啲尊重」，哥斯尼就話「係球員應該做得更多」。正如雲格話齋好快就會決定去留，唔知佢嘅答案係咪你哋想要嘅答案呢？