周四世盃外南美洲區外圍賽上演兩場大戰，阿根廷迎智利靠美斯射入12碼小勝1:0升至第三。阿根廷連續兩屆美洲國家盃決賽輸畀智利，今次美斯總算威番次，不過佢都唔夠荷西保連奴威，後者喺另一場大戰巴西作客烏拉圭雖然先失守，但就靠呢位中超廣州恒大中場連中三元，以4:1反勝，𠵱家喺榜首遙遙領先。
「戴帽」反勝烏圭4:1
前熱刺中場保連奴雖然喺兩年前去咗中超發展，但依然喺國家隊吃得開，自從由堤迪接手後更加受到進一步重用，冇嘅，大家曾經喺哥連泰斯共事過嘛。烏拉圭喺今場世盃外雖然有蘇亞雷斯停賽，但開賽八分鐘都由卡雲尼射入12碼先開紀錄，但之後形勢逆轉，保連奴喺18分鐘就扳平，易邊後六分鐘再建一功；到74分鐘由尼馬拉開至3:1，保連奴喺補時再入一球完成「帽子戲法」。巴西贏波後有30分，領先第五位嘅厄瓜多爾10分，得番五輪比賽形勢大好。
阿根廷喺世盃外一度跌出第五名，到美斯短暫結束國家隊生涯，決定復出之後，隊波又漸入佳境，周四迎智利，美斯喺開賽15分鐘射入12碼奠勝，小勝1:0之後升上第三位。
毒梟偷印美斯嘜頭
美斯又一次顯示佢地位幾咁重要，估唔到連南美毒梟都要借佢大名嚟用吓。話說秘魯警方日前喺運往歐洲嘅貨櫃中檢獲超過1,400公斤毒品，市值高達8,500萬美元（約6.6億港元）嘅可卡因，其中一款一公斤包裝竟然印咗美斯嘅肖像。據當地警方發言人指，呢啲有晒包裝嘅毒品，係表示確保毒品未開封咁話。毒品害人，仲盜用球王個嘜頭，真係衰格！
