鬍鬚曾變身薯片叔後人氣急升，工黨「鬍鬚俠」張超雄就冇咁好彩，除咗早前表明會投白票，被唔少網民聲討，上周更先後兩次入院。
超雄同八方講，上周一喺屋企突然左腎腎石發作，痛到郁唔到，要即時叫白車打止痛針，之後就返立法會開工。點知當晚凌晨又突然劇痛，佢忍咗兩粒鐘後頂唔順，要再次叫白車入院接受治療。
超雄形容腎石發作時，痛到連床都落唔到，要由救護員抬走，上周三接受咗體外衝擊波手術，打散咗嗰粒大約0.4mm嘅腎石，但至今仍未隨小便排出體外，病情反覆，一痛就要食止痛藥。點解會生腎石？出名勤力開會嘅超雄引述醫生話，因為飲唔夠水，坦言開會時怕飲太多水，要成日去廁所太麻煩，所以好少飲水，經過今次慘痛經歷，一定keep住每日飲至少8杯水。