今期（26日）沙田尾場第十場三班1600米，焦點照例是雷神莫雷拉，他揀騎苗禮德馬房「知多福」，此駒在港3戰俱配蘇兆輝，獲得冠亞季各一，實力可謂有餘未盡，初配雷神肯定唔夠3倍。
不過，「知多福」上次跑第三已輸五馬位，今仗由1400增程至1600米，氣量亦有疑問，太熱未必值博。反而此場雷神之棄騎「快樂寶貝」易配巫顯東，隨時帶來驚喜。
「快樂寶貝」上仗谷草一哩用雷神得亞軍只輸條頸，馬兒季初則贏過今仗同程田草1600米，當時「快樂寶貝」所擊敗的「加州再豫」已上到二班，所以計卡士「快樂寶貝」絕不遜於「知多福」。
而「快樂寶貝」亦有動靜，巫顯東連續7日親操，今朝（24日）操完練馬師沈集成早於機坪守候，仔細觀察該駒一舉一動，神態緊張，有晒搏殺手影。
要留意巫顯東近兩場頭馬「獅子驄」、「育成寶貝」，都係擊敗雷神座騎，其中東東贏「育成寶貝」一役，此駒正是雷神的棄騎，雷神揀騎之「福愛寶」卻屈居亞軍。既有先例可循，今次雷神之「知多福」，隨時衰喺東東嘅「快樂寶貝」手上。