民建聯上月中公佈過特首選舉民調，顯示最多市民認為薯片叔叔比奶媽「較為適合」做下屆特首後，但係人都知奶媽民望低過薯片叔叔，咁為咗整個民調撐奶媽，可以去到幾盡？
民記噚日突然發出緊急採訪通知，話公佈最新民調，但今次直情刪走邊個「較為適合」做下屆特首條問題，改為問市民邊位候選人「較為得到中央信任」，結果奶媽大幅領先，有成83.4%受訪者認為佢會較為得到中央信任，薯片叔只有5.9%，胡官則有0.5%。
唔只咁，民記仲喺民調加入問邊位候選人「較有管治能力」，結果又係奶媽反超薯片叔。
八方問點解民調內容有變時，公佈民調嘅陳克勤就話，完全係按委託嘅機構作出嘅「專業意見」修改，話希望能夠「多角度」了解市民意見。同場嘅周浩鼎就話，民記今晚將開會討論最終投票立場，都係傾向支持奶媽喎。