人稱「新興市場之父」嘅麥樸思（Mark Mobius）下月全面退出基金管理！
鄧普頓近日公佈，由4月3日開始，將會分兩輪，為麥樸思有份管理嘅一系列基金委任新基金經理，據指總共涉及12隻基金。麥樸思雖然將要全面交棒，但仍然會留任鄧普頓執行主席，代言人角色不變。
查實麥樸思舊年4月起，已退任首席投資總監（CIO）一職，由Stephen Dover取代，但名義上仲管理多隻新興市場同中國基金。
但據講，佢已有好一段時間無參與基金嘅日常管理，所以今次交棒估計影響唔大。
麥樸思早於1987年加入鄧普頓，至今30年，一直係公司靈魂人物，亦係投資新興市場嘅權威，佢有份管理嘅鄧普頓開發中國家基金，喺2003至2007年、累積回報高達兩倍，但2008年金融海嘯後表現就變得反覆。